Metrodan istifadə edən sakinlərə şad xəbər: 9 stansiya tikiləcək - ÜNVANLAR

Qurum rəsmisi deyib ki, bu stansiyalardan 4-ü Xətaidən sonra Həzi Aslanov-2 stansiyasına qədərdir: "Bu stansiyaların yerləşmə ərazisi Ağ şəhərin girişində, digəri isə Xəzər televiziyasının binası yaxınlığındadır. Bu ərazidə artıq tunel qazılıb. Tikinti işləri məhz buradan başlayacaq. Növbəti stansiya "Nargilə" keçmiş avtomobil zavodu ətrafında, dördüncü isə Həzi Aslanov-2 olacaq. Bu stansiyada da müəyyən işlər görülüb, tamamlanma işləri layihənin həyata keçirilməsindən asılı olacaq.

Bu layihə həyata keçirildikdən sonra hər xəttin özünün müstəqil infrastruktur kimi fəaliyyəti təmin olunmalıdır. Dünya metro sistemində xətlər mütləq qaydada ayrı-ayrı müstəqil fəaliyyət göstərir".

Bəxtiyar Məmmədov əlavə edib ki, İçərişəhərdən sonra bir və ya iki stansiyanın inşası nəzərdə tutulur ki, onun axrasında dönmə kamerası olacaq və qatar bir yoldan digərinə rahat keçərək minimal intervalı təmin edəcək:

"Həzi Aslanovdan çıxan qatar yalnız İçərişəhər istiqamətinə gedəcək. Buradan yaşıl xəttə keçmək üçün isə müxtəlif mənbələr olacaq. Həzi Aslanov, 28 May və Koroğlu stansiyalarında keçidlər olacaq. Bu o, deməkdir ki, Koroğlu stansiyasından Elmlər Akademiyası stansiyasına getmək istəyənlər 15 dəqiqə ərzində ünvana çatacaqlar. İnterval isə 2 dəqiqə olacaq.

Bu layihənin həyata keçməsi ilə qeyd edilən ərazilərin sosial-iqtisadi inkişafından tutmuş metropolitendə ən optimal intervalın tətbiqi və sərnişinlərin rahat daşınmasına qədər işlərə müsbət təkan verəcək. Bakının baş planında inteqrasiya olunmuş nəqliyyat prinsiplərində metropoliten də xüsusi yer tutur. Baş planda xətlərin ayrılması layihəsinə xüsusi yerin verilməsi nəzərdə tutulur".