Şıxlinskilər və Səfərov qardaşlarının işi üzrə andlılar məhkəməsinin kollegiya heyəti formalaşdırılıb

Tarix: 15-01-2026, 17:06

 Yekaterinburqun Kirovski Rayon Məhkəməsi Uraldakı Azərbaycan diasporunun lideri Şahin Şıxlinski və digərlərinin işi üzrə andlılar məhkəməsinin kollegiya heyətini formalaşdırıb.

APA-nın Rusiya bürosu xəbər verir ki, bu barədə Kirovski Rayon Məhkəməsindən bildirilib.

Qeyd olunub ki, qətl və sui-qəsd cəhdi ilə bağlı cinayət işi üzrə andlılar məhkəməsinin kollegiya heyəti formalaşdırılıb.

Müttəhimlər kürsüsündə yeddi təqsirləndirilən şəxsin, o cümlədən regionun Azərbaycan diasporunun lideri Şahin Şıxlinskinin olduğu bildirilib.

Andlılar Məhkəməsinin kollegiya heyəti 26 yanvar saat 14:00-da müşavirəyə başlayacaq.

Qeyd edək ki, ötən ilin iyun ayında Rusiya hüquq-mühafizə orqanları Yekaterinburqdakı azərbaycanlılara qarşı əməliyyat keçirib. Əməliyyat zamanı güc tətbiq olunub və nəticədə iki azərbaycanlı Ziyəddin və Hüseyn Səfərov qardaşları ölüblər. Digər Səfərovlar və bir neçə həmyerlimiz məhkəmənin qərarı ilə həbs olunublar. Onlara qarşı 2001, 2010 və 2011-ci illərdə törədilmiş cinayət ittihamları irəli sürülüb. Daha sonra Yekaterinburqda Azərbaycan diasporunun rəhbəri Şahin Şıxlinski və oğlu Mutvalı Şıxlinski saxlanılıb. Mutvalı Şıxslinskiyə qarşı dövlət nümayəndəsinə qarşı zor tətbiq etmə maddəsi ilə cinayət işi açılıb. Şahin Şıxlinski isə sifarişli qətlə cəhd və dövlət nümayəndəsinə qarşı zor tətbiq etmə maddələri ilə ittiham olunur.