Putin də Füzuliyə gəlir? - AÇIQLAMA

Tarix: 27-10-2021, 13:27

Türkiyə prezidenti Rəcəb Tayyib Ərdoğan İkinci Qarabağ müharibəsindən sonra iki dəfə Qarabağda oldu. 
 
Maraqlıdır, Türkiyədən sonra hansı dövlətin rəhbərinin təyyarəsi Füzuli hava limanına enəcək?

Bununla bağlı "Atlas" Araşdırmalar Mərkəzinin rəhbəri Elxan Şahinoğlu öz fikirlərini bölüşüb. O qeyd edib ki, Cənubi Qafqaz bölgəsində iki dövlətin – Türkiyə və Rusiyanın ağırlığı var:

"Rusiyanın xeyrinə olan amilləri nəzərə alsaq, Kreml sahibinin gələcəkdə Qarabağa səfəri aktuallaşa bilər. Putinin özü də iki dəfə Qarabağa səfər edən türkiyəli həmkarı Ərdoğandan geri qalmaq istəməz. Ancaq Putinin hazırkı şərtlər daxilində Qarabağa səfəri Azərbaycanın maraqlarına cavab vermir. Çünki, Putinin təyyarəsi Qarabağa endikdən sonra o, İlham Əliyevlə görüşüb fikir mübadiləsi aparacaq, "neytrallığını” qorumaq məqsədilə Xankəndiyə gedərək erməni separatçılarının lideri ilə də görüşəcək”.

Ekspert bildirib ki, belə bir görüşü Azərbaycan heç bir halda qəbul edə bilməz:

"Putinin Şuşayla yanaşı, Xankəndiyə gəlişinin Azərbaycana zərəri, faydasından çoxdur. Ona görə də Azərbaycan Qarabağın tamamına nəzarət etmədən və bölgədəki erməniləri tərksilah etmədən Kreml sahibinin Qarabağa gəlişinə ehtiyac yoxdur. Putinin özü də anlayır ki, hazırkı şərtlər daxilində Qarabağa gəlib Şuşayla yanaşı, Xankəndinə getsə, bu Azərbaycan-Rusiya münasibətlərində gərginliyə səbəb olacaq. Onun yalnız Şuşaya vəya Füzuli, Zəngilanı ziyarəti isə erməniləri narazı salacaq. Putin erməniləri də narazı salmaq istəməz”.

Politoloqun sözlərinə görə, Rusiya prezidentinin Qarabağa səfərindən əvvəl Azərbaycanla Ermənistan arasında sülh sazişi imzalanmalı, sərhədlər müəyyənləşməli və Zəngəzur dəhlizi açılmalıdır: 

"Buna baxmayaraq, başqa dövlətlərin rəsmilərinin Füzuli hava limanı üzərindən Qarabağa gəlişləri mümkündür. Bu sırada Azərbaycana dost dövlətlərin – Pakistan, Ukrayna, Gürcüstan, Macarıstanın rəsmi nümayəndə heyətlərinin Qarabağla tanış olmaları mümkündür. Şuşa tam bərpa olunduqdan sonra, bu şəhərdə Türkdilli Dövlətlərin Əməkdaşlıq Şurasının zirvə toplantısını da keçirmək mümkündür”.