"Digər dəniz şəhərlərinin ələ keçirilməsi Rusiyanın planıdır" - GƏLİŞMƏ

Tarix: 24-11-2021, 08:21

"Ukraynanın sərhədləri yaxınlığında Rusiyanın hərəkətliliyi ilə əlaqədar NATO ölkələri fəal addımlar atmağa hazır olduqları barədə Ukrayna hökumətini əmin ediblər". Bu barədə Ukraynanın Müdafiə naziri Aleksey Reznikov "ICTV" telekanalına bildirib. "Ukraynanın beynəlxalq səviyyədə tanınmış sərhədləri daxilində suverenliyinin və ərazi bütövlüyünün qeyd-şərtsiz dəstəklənəcəyinə əmin oldum.

Ona da əmin oldum ki, alyans ölkələri ilə Aİ arasında qətiyyətli addımlar atmağa hazır olmaqla bağlı çox ciddi məsləhətləşmələr gedir. Bura həm siyasi və iqtisadi addımlar, həm də Ukraynaya müəyyən yardım daxildir" - deyə ukraynalı nazir bildirib. Reznikovun sözlərinə görə, o, ABŞ-da səfərdə olarkən ABŞ-ın müdafiə naziri ilə yanaşı, həm də Dövlət Departamentinin nümayəndələri, senatorlar və konqresmenlərlə görüşüb. "Eyni ifadə hər yerdə eşidilir: Rusiya tərəfindən Ukrayna ərazisinə birbaşa müdaxilə və təcavüz sözün bütün mənalarında onlara baha başa gələcək, biz bununla bağlı çox ciddi xəbərdarlıq edirik", - nazir vurğulayıb.

Kremlin mətbuat katibi Dmitri Peskov bildirib ki, Rusiya heç bir ölkəyə hücum etmək niyyətində deyil: "Biz artıq dəfələrlə müxtəlif səviyyələrdə bəyan etmişik ki, Rusiya heç kimə hücum etmək niyyətində deyil və heç bir aqressiv planı yoxdur. Bunun əksini söyləmək isə tamamilə yanlışdır. Rusiya Silahlı Qüvvələrinin ölkə ərazisində hər hansı yerdəyişməsini bu cür planlarla əlaqələndirmək tamamilə yanlışdır. Bu, belə deyil”.

Kremlin sözçüsü qeyd edib ki, Amerika və Ukrayna mediası Rusiyanın Ukraynaya qarşı təcavüzə hazırlaşdığını, Rusiya tərəfi isə Ukraynanın Donbasa, tanınmamış Luqansk və Donetsk Xalq Respublikalarına qarşı aqressiv fəaliyyət planlaşdırdığını iddia edir.

Rusiya və Ukrayna arasında gərginliyə münasibət bildirən Sosial Tədqiqatlar Mərkəzinin mətbuat xidmətinin rəisi, beynəlxalq məsələlər üzrə ekspert Əziz Əlibəyli “Şərq”ə açıqlamasında bildirib ki, Rusiya-Ukrayna münasibətləri müharibəyə doğru gedir. Ekspert qeyd edib ki, bu, qaçılmazdır:

“Hesab edirəm ki, indiki hədəf Rusiyanın Malikov vilayətini ələ keçirməkdir, çünki artıq Krım yarımadasını ələ keçirib və orada külli miqdarda silahlı birləşmələr yığır. Bilirsiniz ki, Krım yarımadası Qara dənizin şərq hissəsinin təhlükəsizliyi nöqteyi-nəzərindən vacib nöqtəsidir. Bu baxımdan da artıq bu yarımadının təkcə dənizdən deyil, quru istiqamətində də təchiz olunması lazımdır. Ona görə də Manipol və yaxındakı digər dəniz şəhərlərinin ələ keçirilməsi Rusiyanın planıdır”.

Ə.Əlibəyli vurğulayıb ki, Donbas müharibəsi getdikcə gərginləşəcək və genişlənəcək:

“İki ölkə arasındakı toqquşmalar son Ukraynanın ABŞ və digər Avropa ölkələri tərəfindən kəskin şəkildə silahlandırılmasını görsək də, düşünürəm ki, hazırda onun strateji müttəfiqi heç də o ölkələr deyil. Tamamən Türkiyədir. Türkiyənin vasitəçiliyi son anda yaydakı proseslərin təkrarlanmamasına imkan yarada bilər. Amma görünür ki, Rusiya təkcə Qara dənizin bütövlükdə şərq hissəsini və Qara dənizin şərq sahillərində Ukrayna hissəsində ələ keçirməklə bağlı niyyətli deyil, eksponsiyanı daha da genişləndirməyi düşünür. Bunu digər NATO ölkələrinə doğru edir, yəni Moldova ilə Dnestryanı ölkədən bura nəzarət edir, hətta ola bilsin ki, onun işğalını reallaşdırsın. Arxasınca, Rumıniya və Bolqarıstanın cəzalandırılması gözlənilir, yəni əgər NATO ilə toqquşmaya gedilərsə. Şübhəsiz ki, Belarus ilə Polşanın cəzalandırılması versiyaları da işə düşə bilər. Bir növ Rusiya artıq daxili problemlərindən xarici problemlərə doğru yönəlmək siyasətini keçib. Demək olar ki, məhz bu istiqamətdə siyasətini çoxvektorlu qurub”.