Ərzaq buğdası problemi həllini tapır? - AKTUAL

 

Prezident İlham Əliyev “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Fərman imzalayıb.

Fərman qlobal ərzaq bazarında baş verən proseslər nəzərə alınmaqla mövcud resursları səfərbər etməyə imkan verən yeni tənzimləmə mexanizmlərinin yaradılması hesabına ölkənin ərzaqlıq buğda ilə özünütəminetmə səviyyəsinin yüksəldilməsi, habelə ərzaqlıq buğda istehsalının təşkili məqsədilə imzalanıb.

Sənədə əsasən, ilkin mərhələdə pilot layihə olaraq, Azərbaycan Respublikasının Kənd Təsərrüfatı Nazirliyi ilə bağlanmış müqaviləyə əsasən müasir suvarma sistemlərinin tətbiq edildiyi təsərrüfatlarda ərzaqlıq buğda istehsalı ilə bağlı öhdəlik götürmüş şəxslər tərəfindən istehsal olunan və Azərbaycan Respublikasının Dövlət Ehtiyatları Agentliyinə və un dəyirmanlarına təhvil verilən ərzaqlıq buğdaya 2023-cü ildən başlayaraq 5 il müddətində məhsul subsidiyası tətbiq ediləcək.

Qeyd edək ki, ölkədə ərzaq təhlükəsizliyinin təmin edilməsi, o cümlədən əsas ərzaq məhsulları ilə özünütəminetmə səviyyəsinin yüksəldilməsi vacib amillərdən biridir. Bu məqsədlə aqrar sahəyə dövlət dəstəyi mexanizmlərinin təkmilləşdirilmsinə və beynəlxalq təcrübəyə əsaslanan yeni dəstək tədbirləri həyata keçirilməinə ehtiyac var.

Bu baxımdan yeni fərmanın ölkənin ərzaq buğdası təminatının yaşılaşdırılmasında hansı rolu olacaq? Millət vəkili Tahir Rzayev Cebhe.info-ya bildirdi ki, bu gün dünyada ərzaq təhlükəsizliyinin təmin olunması vacib bir məsələ kimi qarşıda durur:

“Nəinki dövlətlər, hətta BMT mövcud vəziyyətdən narahatdır. Dəfələrlə BMT-nin rəhbərliyi bir çox ölkələrdən, xüsusilə də Rusiya və Ukraynadan ərzaqlıq buğdanın idxalının sürətləndirilməsinin vacibliyini bildirib.

Bu gün dünyada artıq 1 milyard 600 milyona yaxın insan aclıq təhlükəsi altındadır, 8 milyondan çox insan isə hazırda aclıq çəkir. Sözsüz ki, aclıq təhlükəsizliyinin təmin olunması ilə bağlı qabaqlayıcı tədbirlər görülməlidir. Hələ bir neçə ay öncə Nazirlər Kabineti ərzaq buğdasının qiymətinin artırılması ilə bağlı qərar etdi ki, ölkədən bu məhsullar xaricə ixrac edilməməlidir.

Bununla bağlı, məhdudlaşdırıcı tədbirlər görüldü. Bugünlərdə ilin 6 aylıq yekunlarına həsr olunmuş müşavirədə də Prezident İlham Əliyev ərzaq təhlükəsizliyi ilə əlaqədar çox ciddi məsələlər qarşıya qoydu ki, biz mütləq ərzaq buğdasının istehsalını artırmalıyıq.

Qeyd etdi ki, əkilməmiş 100 min hektardan artıq torpaqda əkin aparmışıq və məhsul gözlənilir. Ölkə başçısının “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Fərmanında qeyd edilən 2023-cü ildən başlayaraq 5 il müddətinə məhsul subsidiyasının verilməsi də ərzaq təhlükəsizliyinin təmin edilməsi üçün çox vacib ciddi tədbirdir. Bu subsidiyalar veriləcəksə, ərzaq buğdasının istehsalına maraq da artmalıdır”.

Millət vəkili deyir ki, sahibkarlar bu sahədə yenidən öz işlərini quracaqlar:

“Çünki başqa məhsullara nisbətən buğda azgəlirlidir. Azərbaycan şəraitində buğda tütünə, pambığa görə o qədər rentabelli deyil. Ancaq bu gün ölkədə yaranmış vəziyyət dövlət başçısını belə bir fərmanın imzalanmasına vadar edir.

Ölkə başçısı müəyyən hesablamalar aparır ki, gələcəkdə vəziyyət ciddiləşə bilər. Ancaq statistika və proqnozlar göstərir ki, Azərbaycan ehtiyat taxıl, ərzaq buğdası, eləcə də digər məhsullarla bağlı təmin etməyə qadirdir, elə bir çətinlik gözlənilmir. Bununla yanaşı biz nə bilirik ki, sabah nə ola bilər?

Məsələn, pandemiya anidən gəldi və dünya çətiliklə üzləşdi. Bu gün dünyada ən çox taxıl istehsalçısı ölkələr müharibə edirsə, sabah ola bilsin ki, digər ölkələr bu bəlalara cəlb olundu. Ona görə də bu fərman qabaqlayıcı bir tədbirdir və alqışlanmalıdır”.