Trampı ilk onlar təbrik etdi - Siyahıda Zelenski də var

Tarix: 6-11-2024, 12:56

Xəbər verdiyimiz kimi, Respublikaçılar Partiyasından ABŞ prezidentliyinə namizəd Donald Tramp seçkilərdə qələbə qazandığını elan edib və özünü ölkənin 47-ci prezidenti adlandırıb.

Dünya liderləri və siyasətçilər də artıq Trampı təbrik etməyə başlayıb.

Belə ki, onu təbrik edənlər arasında Ukrayna Prezidenti Volodimir Zelenski, Fransa lideri Emmanuel Makron, İsrailin Baş naziri Benyamin Netanyahu, Macarıstanın Baş naziri Viktor Orban, NATO Baş katibi Mark Rutte, Gürcüstan hökumətinin başçısı İrakli Kobaxidze də var. 

Makron öz təbrikində Trampla “sülh və firavanlıq naminə” işləməyə hazır olduğunu qeyd edib. Orban isə 78 yaşlı siyasətçinin qələbəsinin bütün dünya üçün çox zəruri olduğunu hesab etdiyini vurğulayıb. Netanyahu öz növbəsində Donald Trampın Ağ Evə geri qayıtmasını tarixi hadisə adlandırıb. 

Zelenski isə “X” hesabında etdiyi paylaşımda qeyd edib: “Prezident Trampı şəxsən təbrik etmək imkanını və Ukraynanın ABŞ ilə strateji tərəfdaşlığını gücləndirmək yollarını müzakirə etməyi səbirsizliklə gözləyirəm”.

Xatırladaq ki, hazırda səslərin hesablanması davam edir. Prezident postu uğrunda Demokratların nümayəndəsi Kamala Harrislə Respublikaçılar Partiyasının namizədi Donald Tramp mübarizə aparıb. “Fox News”un məlumatına görə, Tramp seçkilərdə qalib gəlmək üçün tələb olunan 270 seçici səsi həddini keçib və 277 səs toplayıb.