Cənubi Koreyada mərminin evə düşməsi nəticəsində 15 nəfər xəsarət alıb - YENİLƏNİB

Tarix: 6-03-2025, 11:46

Cənubi Koreyada təlim zamanı iki KF-16 qırıcısının səhvən təlim poliqonundan kənarda səkkiz "hava-yer" tipli bomba atması nəticəsində 15 nəfər yaralanıb.

Bu barədə "Yonhap" agentliyi məlumat yayıb.

Xəsarət alanlar arasında iki xarici vətəndaş da var.

Partlayış Seuldan təxminən 40 kilometr şimalda yerləşən Poçxon kəndinin üzərində baş verib. Kilsə və digər yeddi bina zərər görüb.

***

Cənubi Koreyanın Phoçhon şəhərində azı yeddi nəfər təlimlər zamanı atılmış və yaşayış evinə düşmüş mərmi səbəbindən yaralanıb.

Bu barədə “Yonhap” agentliyi məlumat yayıb.

Müvafiq müraciət yerli vaxtla saat 10:00 radələrində (Bakı vaxtı ilə 05:00) qeydə alınıb, həmçinin kənddə bir neçə tikili dağılıb. Hadisənin təfərrüatları ilə bağlı istintaq başlanılıb.

Koreya Respublikası Hərbi Hava Qüvvələri təlimlər zamanı KF-16 qırıcı təyyarəsindən poliqon xaricində səkkiz MK-82 aviabombanın ştatdankənar şəkildə düşdüyünü açıqlayıb.

“Biz mərmilərin ştatdankənar düşməsi nəticəsində yaşayış evlərinin zədələnməsi ilə bağlı insidentdən təəssüflənirik, yaralananlara tezliklə şəfa diləyirik. Zərərçəkənlərə təzminat da daxil olmaqla lazımi tədbirləri görmək niyyətindəyik”, – Hərbi Hava Qüvvələrindən bildirilib.

“Yonhap” agentliyinin məlumatına görə, ABŞ və Koreya Respublikası cümə axşamı günü KXDR ilə sərhəddən 25 km məsafədə yerləşən Phoçhon şəhərindəki Sınçjın poliqonunda döyüş atışlı təlimlər keçirib. Manevrlərdə tanklar, helikopterlər və təyyarələr daxil olmaqla ümumilikdə 160 ədəd texnika iştirak edib.