COVID-19 pandemiyası ilə əlaqədar ölkəmizdə tətbiq edilən karantin rejiminin yumşaldılması çərçivəsində Nazirlər Kabineti yanında operativ qərargahın 10 avqustdan etibarən açıq havada idman yarışlarının və oyunlarının keçirilməsinə icazə verməsi şosse velosipedi üzrə 23 yaşadək (U-23) və gənclər yığmamızın üzvlərinin Tovuz rayonuna təlim-məşq toplanışına yollanmasına şərait yaradıb.
Oxu.Az xəbər verir ki, Gənclər və İdman Nazirliyinin dəstəyi ilə avqustun sonunadək Tovuzda hazırlıq keçəcək yığma üzvlərimizin sentyabrda Türkiyədə keçiriləcək bir neçə beynəlxalq turnirdə, həmçinin, İsveçrədə təşkil olunacaq dünya çempionatında iştirakı planlaşdırılır.
Qeyd edək ki, Fransa hökumətinin iki həftəlik karantin tələbi səbəbindən yığma komandamız avqustun 24-28-də bu ölkədə təşkil ediləcək Avropa çempionatında iştirak etməyəcək.