Rüfət İsmayılın külli miqdarda pulu mənimsənildi, evsiz qaldı

Tarix: 10-01-2023, 13:00

 
Türkiyədə yaşayan azərbaycanlı modelyer Rüfət İsmayılın başına iş gəlib. 

Modelyer müflis olan bir tikinti şirkətinin onun 5 milyon 250 min lirəsini (475 278 AZN) mənimsədiyini açıqlayıb. 

Belə ki, İsmayıl 2013-cü ildə şirkətin Esenyurtdakı lüks bir layihə üçün müqavilə bağlayıb. Modelyer 158 kvadratmetrlik ev üçün 280 min dollar (476 000 manat-red.) ödəniş edib. Rüfət hətta pulun bir qismini ödəmək üçün Azərbaycandakı ata evini satıb. 

Evin 2015-ci ildə təhvil veriləcəyi deyilsə də, şirkət sözünü tutmayıb. Müxtəlif bəhanələrlə hər dəfə vaxtı uzadan şirkət müflis olduğunu açıqlayıb.

Rüfət artıq məhkəməyə müraciət etdiyini deyib: “İki evdən də oldum. Artıq iki ölkədə də evsizəm. Mənə edilən bu haqsızlığı qəbul etməyim mümkün deyil. Haqqımı sonuna qədər alacağam”. 

“Qafqazinfo”