Rəsmi Bakı Ermənistanın “işğal” iddiasına cavab verdi

Tarix: 22-05-2021, 14:52

Rəsmi Bakı Ermənistan Xarici İşlər Nazirliyinin Azərbaycanın guya Qarabağı işğal etməsinə dair iddialarına cavab verib.

Azərbaycan XİN-in mətbuat katibi Leyla Abdullayeva bəyan edib ki, bütün bu illər ərzində beynəlxalq hüququn fundamental prinsiplərinin məhz Ermənistan tərəfindən tapdalanması, son 30 ildə iki dövlət arasında sərhədin müəyyən olunmamasının əsl səbəbkarıdır.

“Ermənistanın 30 ildən sonra nəhayət beynəlxalq hüququ yada salması ümumilikdə müsbət bir haldır. Lakin, Ermənistan yenə də beynəlxalq hüquq prinsiplərini özünəməxsus şəkildə başa düşür”,-deyə o əlavə edib.

Onun sözlərinə görə, Ermənistan hələ də anlamır ki, bir ölkə öz ərazisini işğal edə bilməz, yalnız işğaldan azad edər.

“Ermənistanın artıq bu həqiqəti anlaması, yaranmış yeni vəziyyəti qəbul etməsi gərəkdir.

Bir daha Ermənistanı özünün istinad etdiyi beynəlxalq hüquq prinsipləri əsasında münasibətlərin normallaşdırılmasına və hər hansı fikir ayrılıqlarının həllində konstruktivlik nümayiş etdirməyə çağırırıq”.