Azərbaycan gəncləri beynəlxalq gənclər forumlarına çağırış etdi - FOTO

Tarix: 7-06-2021, 15:29

4 iyun 2021-ci il tarixində Kəlbəcər rayonunun Susuzluq kəndi ərazisində media nümayəndələrini daşıyan nəqliyyat vasitəsinin tank əleyhinə minaya düşərək partlaması nəticəsində iki nəfər media nümayəndəsi - Azərbaycan Televiziyasının operatoru Sirac Abışov və Azərbaycan Dövlət İnformasiya Agentliyinin müxbiri Məhərrəm İbrahimovun, habelə rayon icra hakimiyyətinin nümayəndəsi Arif Əliyevin həlak olması və 4 nəfərin yaralanması ilə bağlı Azərbaycanın gəncləri və gənclər təşkilatları beynəlxalq gənclər forumlarına çağırış edib.

Təşkilatdan verilən məlumata əsasən, çağırışda qeyd edilir ki, Kəlbəcərdə baş vermiş son hadisə Ermənistan tərəfindən beynəlxalq humanitar hüququn növbəti ciddi pozuntusudur.

Belə ki, ötən 30 ilə yaxın dövrdə Azərbaycan ərazilərini işğal altında saxlayan Ermənistanın yerli əhaliyə və infrastruktura qarşı törətdiyi vandalizmə görə üzr istəməsini gözlədiyimiz halda, bu ölkə həmin ərazilərdə basdırdığı minaların xəritəsini verməkdən imtina edir və nəticədə, artıq 6 aydan çoxdur ki, azad edilmiş bu ərazilərdə mülki əhali mina partlayışı nəticəsində həlak olmaqda davam edir. Ermənistanın bunu etməkdə yeganə məqsədinin azərbaycanlı əhalinin həmin ərazilərə təhlükəsiz və layiqli şəkildə qayıtmasını əngəlləməkdir.

Sənəddə diqqətə çatdırılıb ki, üç ölkə rəhbərinin ötən il noyabrın 10-da imzaladıqları və silahlı münaqişəyə son qoyan bəyanatından sonra 130-dan artıq azərbaycanlı mülki şəxs, o cümlədən xeyli gənc məhz mina partlayışı nəticəsində həlak olmuş və ya xəsarət almışlar.

Qeyd olunur ki, Ermənistanın bu məsuliyyətsiz və cinayət xarakterli davranışı təkcə beynəlxalq humanitar hüquqa ziddiyyət təşkil etmir, həmçinin iki ölkə arasında etimad quruculuğunu və davamlı sülhün bərqərar olmasını əngəlləyən ən əsas amildir. Sonda Azərbaycan gəncləri və gənclər təşkilatları beynəlxalq gənclər forumlarını Ermənistanın müharibə cinayətlərini pisləməyə, həmçinin minalı ərazilərin xəritələrini təxirəsalmadan təqdim etməsini, təxribatçı addımlarından əl çəkməsini və beynəlxalq hüquqdan irəli gələn bütün öhdəliklərini yerinə yetirməsini tələb etməyə çağırıblar.