Azərbaycanda əhali ən çox hansı spirtli içkini içir? – İldə yarım milyarda yaxın pul xərclənir...

Tarix: 16-07-2021, 12:43

Azərbaycan əhalisi son 5 ildə spirtli içkilərə xərclədiyi pulu 39 faizdən çox artırıb.

2016-cı ildə 311 milyon manatlıq spirtli içki alan əhali ötən il spirtli içkilərə çəkilən xərci 431,6 milyon manata çatdırıb.

Spirtli içkilərə xərclənən vəsaitin artmasının səbəbi aksiz vergilərinin artırılması ilə əlaqədar qiymətlərin yüksəlməsidir. Son 5 ildə araq və konyakın qiyməti 36 faiz, pivənin qiyməti 40 faiz, çaxırın qiyməti isə 27 faiz artıb.

Bahalaşma ilə bərabər 5 ildə əhalinin sayında da artım olub. 2016-cı ildən bəri əhali sayı 3 faiz artıb.

Deməli, həm qiymət artımı, həm də əhali sayındakı artım spirtli içki istehlakının 40 faizə yaxın artmasını şərtləndirib. Qiymət artımlarını və istehlak miqdarındakı dəyişikliyi müqayisə etdikdə aydın olur ki, ölkəmizdə spirtli içki alışında real artım qeydə alınıb.

Bəs, əhali daha çox hansı spirtli içkiləri istehlak edir?

Məlumatların təhlili göstərir ki, daha çox vəsait pivə istehlakına gedir. 2020-ci ildə əhali pivəyə 206,2 milyon manat xərcləyib. Son 5 ildə pivə istehlakı 51,5 faiz artıb.

Arağa 171,2 milyon manat xərclənib. 2016-cı ildən bəri arağa çəkilən xərcdə artım 30 faiz olub.

Şəraba 38,2 milyon manat, konyaka 8,3 milyon manat, köpüklənən şəraba 7,7 milyon manat xərclənib.