"Şanxay" adlanan ərazidə dəmir yoluna sıx tikilən evlərlə bağlı AÇIQLAMA

Tarix: 17-12-2019, 12:25

“Bakıda “Şanxay” adlanan ərazidə dəmir yolu xətlərinə sıx tikilən evlərlə bağlı məsələnin həll edilməsi istiqamətində işlər aparılır”.
Mediabiz.az-ın məlumatına görə, bunu “Azərbaycan Dəmiryolları” QSC-nin sədri Cavid Qurbanov Yeni Azərbaycan Partiyasının qərargahında keçirilən mətbuat konfransı zamanı deyib.
C. Qurbanov bu məsələ ilə bağlı vətəndaşlara da müraciət edib: "Evlərinizi tikəndə elə yerdə tikin ki, həm özünüz üçün təhlükə olmasın, həm də sonradan sökülməsin".
Qurumun sədri onu da əlavə edib ki, bəzən insanlar ev tikərkən məqsədəuyğun olmayan – elektrik xətləri və ya dəmir yollarının ərazilərini seçir.
""Şanxay" adlandırılan ərazini götürək. O ərazi, təəssüf ki, ev tikmək üçün münasib deyil. Biz dəmir yollarının yaxınlığında olan təhlükəli evləri sökmək məcburiyyətində qaldıq. Bu, onların yaşayış şəraitini yaxşılaşdırmağa xidmət edir. Artıq onlar daha yaxşı şəraitdə yaşayırlar", - deyə C. Qurbanov əlavə edib.
Buna baxmayaraq, QSC-nin sədr bildirib ki, bu ərazidə qeyri-qanuni olaraq yerləşən əhali var: “Biz onları əvvəlcə sənədləşdiririk, sonra çalışırıq ki, məsələni həll edək”.//Apa.az