Karantin rejimi sərtləşdirilir? - RƏSMİ AÇIQLAMA

Tarix: 13-03-2021, 10:47

Son günlər cəmiyyətdə ayrı-ayrı şəxslər arasında, bəzi kütləvi informasiya vasitələrində, sosial şəbəkələrdə bayram ərəfəsində TƏBİB-in karantin rejimini sərtləşdirəcəyi ilə bağlı şayiələr yayılıb.

Bununla bağlı “Tibbi Ərazi Bölmələrini İdarəetmə Birliyi” ( TƏBİB ) açıqlama yayıb.

Bildirilib ki, karantin rejiminin müəyyənləşdirilməsi ilə bağlı hər hansı qərarın qəbulu birmənalı şəkildə TƏBİB-in səlahiyyətlərinə aid olan məsələ deyil. Başqa sözlə, koronavirusla əlaqədar qapanma və yaxud da yumşalma tədbirləri TƏBİB tərəfindən həyata keçirilmir.

Nazirlər Kabineti yanında operativ qərargahın üzvü kimi TƏBİB yalnız müalicə və müayinəylə bağlı tövsiyələr verir.

“Bütün bunlarla bərabər, vurğulayaq ki, dünyada olduğu kimi, Azərbaycanda da karantin qaydaları insanların sağlamlığının qorunması üçün tətbiq olunur. Hətta bir çox ölkələrdə vaksinasiyanın başlamasına baxmayaraq, hələ də pandemiya ilə mübarizədə karantin qaydalarının tətbiqi zəruri hesab edilir.

TƏBİB pandemiya ilə mübarizədə operativ qərargahın qərarlarını icra edir və buna uyğun fəaliyyətini təşkil edir”, - deyə məlumatda deyilir.