Baş redaktor prezidentliyə namizədliyini irəli sürdü

Tarix: 23-12-2023, 14:31

Yazıçı- publisist, "Olaylar" qəzeti və eyniadlı Agentliyin baş redaktoru Yunus Oğuz növbədənkənar prezident seçkilərində öz təşəbbüsü ilə namizəd olacağını açıqlayıb.

Bu barədə o, özü məlumat verib.

Y. Oğuz yaxın günlərdə sənədlərini rəsmi olaraq Mərkəzi Seçki Komissiyasına (MSK) təqdim edəcəyini bildirib:

"Tarixi qələbəmizdən sonra ilk dəfə olaraq müstəqil, süveren Azərbaycanda keçirilən prezident seçkilərində iştirak etmək şərəfli bir missiyadır. Radikal müxalifətin seçkiləri boykot etmək qərarını pisləyirəm. Çünki, bu prezident seçkiləri təkcə ölkədaxili məsələ yox, həm də beynəlxalq hadisədir. Hesab edirəm ki, prezident seçkilərində iştirak etmək üçün şəffaf və demokratik mühit mövcuddur. Həmçinin Vətən müharibəsindən sonra yaranan yeni reallıqlar fövqündə görüləcək kifayət qədər işlər var. İşğal edilmiş ərazilərdə quruculuq və bərpa işləri, "Qayıdış" Dövlət Proqramının icrası, ölkənin iqtisadi dayanıqlığının təminatı, əhalinin sosial rifahının daha da yüksəldilməsi kimi mühüm vəzifələr qarşısındayıq. Prezident seçkilərinə namizədliyimi irəli sürməkdə məqsədim həlli vacib olan məsələlərin reallaşmasına öz töhvəmi verməkdən ibarətdir. Dövlətimizin orta və uzaq hədəflərində onun yanında olmaq şərəf və vətəndaşlıq borcudur. Millətimiz və dövlətimiz üçün xeyirli, uğurlu olsun!"

Xatırladaq ki, Y. Oğuz 2003-cü ildə keçirilən prezident seçkilərində də namizəd olub və Azərbaycan Respublikasının prezidenti İlham Əliyevin xeyrinə namizədliyini geri götürüb.