Aşura günü bizim üçün əzizdir, lakin... - Sosioloq

Tarix: 29-08-2020, 16:55

Məhərrəm ayı və Aşura günü bizim üçün əzizdir, lakin əhalinin sağlamlığını təhlükəyə atmamaq üçün müəyyən məhdudiyyətlərə ehtiyac var.
Bu sözləri Axar.az-a sosioloq Əhməd Qəşəmoğlu Aşura günündə insanların riayət etməli olduğu qaydalar haqda danışarkən deyib. O bildirib ki, şəriət qaydalarına görə, təhlükə yaradan hər şey haramdır:
“Yaşadığımız pandemiya dönəmində təhlükə yaradan davranış və hərəkətlərimiz haramdır. Bunu xalqa sadə dildə izah etmək lazımdır. Hər il Aşura günü insanların məscidlərdə çox sıx şəkildə toplandığını müşahidə edirdik. Hazırda pandemiya dönəmində Bakı şəhərində, eləcə də koronavirusun yayıldığı bölgələrimizdə belə məclislərin keçirilməsi məsləhət deyil. Bildiyimiz kimi, koronavirus infeksiyasını daşıyan şəxs kütləvi yerdə olarsa, ciddi fəsadları ola bilər, onlarla, hətta yüzlərlə insanın yoluxması riski yaranar. Ona görə də budəfəki Aşura günündə insanların kütləvi toplaşması məqsədəuyğun deyil”.