Ombudsmandan diversantlar məsələsinə REAKSİYA: “Onlar hərbi əsir deyil!”

Tarix: 13-01-2021, 14:12

Azərbaycan Respublikasının Ombudsmanı olaraq işğaldan azad edilmiş ərazilərimizdə Ermənistan tərəfindən qəsdən diversant qüvvələrin yerləşdirilməsini və onların terrorçu fəaliyyətini qəti şəkildə pisləyirəm. Təhlükəsizlik orqanları və Silahlı Qüvvələrimiz tərəfindən onların saxlanılmasını tam qanunamüvafiq hesab edirəm”.

Bu fikirləri açıqlamasında Azərbaycan Respublikasının Ombudsmanı Səbinə Əliyeva bildirib.

Ombudsmanın sözlərinə görə, beynəlxalq humanitar hüquq normalarına, o cümlədən müharibə qurbanlarının müdafiəsi haqqında 1949-cu il tarixli Cenevrə Konvensiyasının müddəalarına əsasə, bu qrupdan olan şəxslər hərbi əsir hesab edilə bilməz.

"Qanunsuz silahlı birləşmələrin mövcudluğu kobud hüquq pozuntusu olmaqla, insan və vətəndaş hüquqlarına ciddi təhlükə və təhdiddir. Qanunsuz silahlı dəstə üzvlərinin həbs edilməsi etnik mənsubiyyətindən, vətəndaşlığından asılı olmayaraq, həmin ərazilərdə yerləşən hər kəsin başlıca yaşamaq hüququ olmaqla, hüquq və azadlıqlarının təminatına, ölkə ərazisində real terror və cinayət hallarının qarşısının alınmasına xidmət edir.

10 noyabr 2020-ci il tarixli üçtərəfli bəyanata əsasən, hərbi əməliyyatların dayandırılmasından və sənədin qüvvəyə minməsindən sonra Ermənistan tərəfindən Azərbaycan ərazilərinə silahlı diversiya dəstələrinin göndərilməsi həmin bəyanatın pozulması kimi qiymətləndirilməlidir. Diversiya dəstələrinin əməllərinin isə terror və cinayət xarakteri daşıdığı qeyd olunmalıdır”.

Səbinə Əliyeva erməni diversiya-təxribat qruplarının əməlləri nəticəsində Azərbaycan tərəfindən ölən və yaralanan hərbçi və mülki vətəndaşlarımızın olduğunu da qeyd edib:

"Hesab edirəm ki, bunu unutmalı deyilik. Bu, özlüyündə Ermənistan tərəfinin beynəlxalq hüquqa, o cümlədən, artıq qüvvəyə minmiş üçtərəfli bəyanata laqeyd münasibətini açıq-aşkar göstərir. Düşünün ki, uzun illər ərzində BMT TŞ-nın 4 qətnaməsini icra etməkdən yayınan bir dövlətin bu cür hərəkətləri hələ də orada beynəlxalq hüquq və insan haqları məfhumlarına münasibətin hansı səviyyədə olduğunu bir daha dünya ictimaiyyətinə göstərməkdədir. Zənnimcə, Azərbaycanın silahlı qüvvələri və dinc əhalisinin həyat və sağlamlığı üçün ciddi təhlükə yaradan Ermənistanın, ölkəmizə qarşı bu təxribatları insanların təkcə fiziki və maddi cəhətdən deyil, mənəvi və psixoloji baxımdan ağır və riskli vəziyyətdə qalmasına, təhlükəsiz və sağlam ətraf mühitə, yaşamağa və digər hüquq və azadlıqlarının kobud şəkildə pozulmasına səbəb olduğundan, o cinayətkar əməllərə qeyd-şərtsiz son qoyulmalıdır. Bu diversiya qrupu Azərbaycan xüsusi orqanları tərəfindən saxlanılıb. Onların əməlləri cinayət məsuliyyətinə cəlb olunub. Bu da beynəlxalq hüquq normalarına uyğundur”.

Ombudsman yaxın günlərdə saxlanılan erməni diversantlara baş çəkməyi nəzərdə tutduqlarını da istisna etməyib:

"Azərbaycan hər zaman vətəndaşlığından, mənsubiyyətindən asılı olmayaraq Ombudsmana müraciət edən heç kəsin müraciətini diqqətsiz qoymur. Yaxın vaxtlarda diversantlara baş çəkməyi nəzərdə tutmuşuq”.


Xatırladırıq ki, Azərbaycan Respublikasının Dövlət Təhlükəsizliyi Xidməti və Müdafiə Nazirliyinin həyata keçirdikləri birgə əməliyyat nəticəsində Azərbaycan Respublikasının işğaldan azad edilmiş Xocavənd rayonu ərazisində Ermənistan tərəfindən məqsədyönlü şəkildə yerləşdirilmiş 62 nəfərdən ibarət erməni terrorçu-diversant qrupu saxlanılaraq, istintaqa təhvil verilib.
 
Saxlanılanların hamısı Ermənistanın Şirak vilayətindən Ermənistan silahlı qüvvələrində hərbi xidmət keçmək üçün çağırılmış və Azərbaycan Respublikasının ərazilərində onun Silahlı Qüvvələrinin üzvlərinə və mülki əhalisinə qarşı diversiya və terror aktları törətmək məqsədilə bu ərazilərə yeridilib.
İstintaq zamanı müəyyən edilib ki, erməni terrorçu-diversiya qrupunun üzvləri 26 noyabr 2020-ci il tarixində, yəni Azərbaycan Respublikası və Rusiya Federasiyası Prezidentləri və Ermənistan Baş nazirinin imzaladığı üçtərəfli bəyanatla əldə edilmiş atəşkəsin qüvvəyə minməsindən sonra Azərbaycan ərazilərinə göndəriliblər. modern.az