Cari ilin bir ayı ərzində 613 kq narkotik vasitə dövriyyədən çıxarılıb - RƏSMİ

Tarix: 5-02-2021, 23:22

Bu ilin 1 ay 4 günü ərzində polis orqanları tərəfindən 613 kq narkotik vasitə aşkarlanaraq qanunsuz dövriyyədən çıxarılıb.
Bu barədə DİN-in mətbuat xidmətinin kütləvi informasiya vasitələri və ictimaiyyətlə əlaqələr şöbəsinin rəisi, polis mayoru Elşad Hacıyev məlumat verib.
O bildirib ki, respublikanın daxili işlər orqanları tərəfindən aparılan kompleks əməliyyat-profilaktik tədbirləri nəticəsində bu istiqamətdə işlər ildən-ilə müsbət istiqamətdə dəyişir:
“Belə ki, respublikanın daxili işlər orqanları tərəfindən bu ilin 1 ay 4 günü ərzində 193 kq marixuana, 344 kq heroin, 68 kq tiryək, 1 kq həşiş, 2 kq digər narkotik tərkibli vasitələr, eləcə də 67 kq metamfetamin aşkar edilərək qanunsuz dövriyyədən çıxarılıb”.
“Təkcə bu rəqəmin böyük hissəsi, 316 kq narkotik vasitə, o cümlədən 74 kq marixuana, 179 heroin, 62 kq tiryək, 1 kq həşiş, 43 kq psixotrop maddə Baş Narkotiklə Mübarizə İdarəsi və onun tabeli orqanlarının əməkdaşları tərəfindən müəyyən edilərək qanunsuz dövriyyədən çıxarılıb”, - deyə E.Hacıyev qeyd edib.
O bildirib ki, narkotik vasitələrin qanunsuz dövriyyəsi ilə məşğul olan şəxslər müəyyən olunaraq aidiyyəti üzrə təhvil veriliblər və onlar barəsində istintaq orqanlarında müvafiq istintaq hərəkətləri aparılır:
“Məqsədimiz narkotik vasitələrin qanunsuz dövriyyəsinə qarşı aparılan mübarizənin effektiv nəticəsinin olmasıdır. Xüsusilə vurğulamaq istəyirəm ki, narkotik vasitələrin qanunsuz dövriyyəsinə qarşı mübarizə çərçivəsində görülən tədbirlərin effektiv nəticəsini təhlil etdikdə bu ilin 1 ay 4 günü ərzində əldə olan nəticələrin ötən ilin 4 ayı ilə müqayisədə daha çox olduğu məlum olur”.