Rusiyada neçə Azərbaycan vətəndaşı qanunsuz yaşayır?

Tarix: 20-04-2021, 13:20

Rusiya Daxili İşlər Nazirliyi bir gün əvvəl xarici dövlətlərin milyondan çox vətəndaşının ölkə ərazisində qanunsuz yaşadığını bildirib. Onların arasında, guya, 120 min nəfər Azərbaycan vətəndaşı olan şəxs var. Rusiya Federasiyası Daxili İşlər Nazirinin müavini Aleksandr Qorovoy MDB Parlamentlərarası Assambleyasının iclasında vəziyyətin iyunun 15-dən əvvəl düzəldilməsi lazım olduğunu, əks halda bu adamların ölkədən çıxarılacağı barədə xəbərdar edib.

Moskva Hökuməti yanında Etnik Məsələlər Şurasının Miqrasiya Məsələləri Komissiyasının sədri Yuri Moskovski Caliber.Az-a müsahibəsində sözügedən 120 min azərbaycanlının kim olduğu, bu rəqəmin haradan götürüldüyü barədə açıqlama verib.

Müsahibin sözlərinə görə, söhbət Rusiya qanunlarına görə ya Federasiya ərazisində qalma şərtlərini pozanlar, ya da iki və ya daha çox inzibati xəta törətmiş (bu ölkədən çıxarılma və ölkəyə giriş qadağasını nəzərdə tutur) əcnəbi vətəndaşlardan gedir.

“Bu qanunun bir neçə il əvvəl qəbulundan bəri 2-3 milyona yaxın inzibati xaric etmə hadisəmiz var, həmin adamların bəziləri bir neçə dəfə ölkədən çıxarılıb. Rusiya Federasiyası Daxili İşlər Nazirinin müavini Aleksandr Qorovoy sadəcə mövcud vəziyyəti açıqlayıb”.

O, bir il əvvəl, Rusiya prezidenti Vladimir Putinin fərmanı ilə əcnəbilərin ölkə ərazisində qalma müddətini sıfırlayaraq humanitar fəlakətin qarşısını aldığını və koronavirus pandemiyası dövründə onların xaric edilməməsi barədə göstəriş verdiyini xatırlatdı.

“Ancaq məsələ burasındadır ki, sıfırlamaya baxmayaraq inzibati xətalar və cərimələr üst-üstə yığılır”, - deyə Y.Moskovski bildirib.

Məsələ burasındadır ki, pandemiya hələ də davam edir, həmçinin Azərbaycan sərhədində məhdudiyyətlər qüvvədədir...

Komissiya sədrinin sözlərinə görə, əslində, RF prezidentinin keçən ilki fərmanı bununla bağlı olub.

“İnsanlar hara çıxarılacaq? Eyni zamanda, artıq sizə dediyim kimi, Rusiya Federasiyası ərazisindəki qeyri-qanuni mühacirlərin əksəriyyəti iki qanun pozuntusu törətmiş insanlardır və qanun çıxarılmasını tələb edir. Buna görə də çoxdan bəri danışılan qanunu təcili olaraq dəyişdirməliyik. Bu, Rusiya Federasiyasının imicinə, Rusiya iqtisadiyyatına xələl gətirir, qeyri-insani xarakter daşıyır. Nə səbəbə antihumanitar xüsusiyyət daşıyır? Çünki cəza cinayətə uyğun olmalıdır. Burada isə belə deyil”.

O, onsuz da ölkədən çıxarılmanın hazırda texniki cəhətdən mümkün olmadığını vurğuladı.

“Pandemiya sona çatmayıb. Hazırda Azərbaycanın sərhədləri bağlıdır, bəs vətəndaşları hara göndərəcəklər, iyunun 15-dən sonra onlar ümumiyyətlə hara gedə bilərlər? Ola bilsin prezident bununla bağlı yeni bir qərar verər”, - deyə Yuri Moskovski qeyd edib.