Şəhidin bacısı: “O deyirdi ki, rus olsam da, Azərbaycanda yaşayıram, öz borcumu yerinə yetirməliyəm” - VİDEO

Tarix: 26-10-2020, 18:11

İşğal olunan torpaqlarmızın azadlığı uğrunda döyüşlərdə şəhid olan hərbi qulluqçu Dmitri Solntsevlə vida mərasimi keçirilib. 

Baku TV xəbər verir ki, şəhidin yaşadığı binanın qarşısında təşkil edilən mərasimdə dövlət qurumlarının rəsmiləri, Milli Məclisin üzvləri, ictimaiyyət nümayəndələri və sıravi vətəndaşlar iştirak ediblər. 

Dmitri sentyabrda könüllü şəkildə döyüşlərə gedib. Yaxınlarının sözlərinə görə, cəbhəyə getmək onun arzusu idi. 
Qeyd edək ki, Dövlət Neft və Sənaye Universitetində təhsil alan Dmitri magistraturanı qırmızı diplomla bitirib. Vətənpərvər insan olub. Hətta koronavirusla mübarizəyə dəstək məqsədilə TƏBİB-də könüllü kimi çalışıb.

Şəhidin bacısı Yuliya Solntseva onunla bağlı xatirələrini bölüşüb:

“Dmitri deyirdi ki, rus olsam da, Azərbaycanda yaşayıram, bura mənim torpağımdır, öz borcumu yerinə yetirməliyəm”.

Hərbçinin cənazəsi Rus-Pravoslav kilsəsinə aparılıb. Kilsədə dini ayin keçirilib, dualar oxunub.

O, İkinci Fəxri xiyabanda dəfn edilib.